ശ്രാവണബലഗോള

ഒരു ചെറിയ ഇടവേളക്ക് ശേഷം വീണ്ടും ഒരു യാത്ര. ബേലൂരും ഹാളീബീഡും ശ്രാവണബലഗോളയും ലക്ഷ്യം. മംഗലാപുരം വരെ ട്രെയിനിലെത്തി അവിടുന്ന് ഹാസ്സന്‍. സ്വന്തം വാഹനത്തിലാണെങ്കില്‍ മംഗലാപുരത്തിന് പോകേണ്ടതില്ല. മംഗലാപുരം - ഹാസ്സന്‍ നാല് മണിക്കൂറിലധികം എടുക്കുന്ന യാത്രയാണ്. ദൂരം നോക്കിയിട്ട് കാര്യമില്ല, മല ചുറ്റിയുള്ള വഴിയാണ്. കുറെ സമയം കാട് തന്നെ. ഹാസ്സനില്‍ പുതിയ ബസ്സ് സ്റ്റാന്‍റില്‍ എത്തി ഒരു ഓട്ടോ പിടിച്ച് നമുക്ക് പറ്റുന്ന ലോഡ്ജ് ഏര്‍പ്പാടാക്കി തരാന്‍ പറഞ്ഞു. ആദ്യം പോയ സ്ഥലത്ത് മുറി കിട്ടിയില്ലെങ്കിലും അടുത്ത സ്ഥലം ഓകെ. പഴയ സ്റ്റാന്‍ഡിനടുത്തായതിനാല്‍ യാത്രയ്ക്ക് സൌകര്യമായി. റൂം നന്ന്, റേറ്റും കുഴപ്പമില്ല (Rs.300). വേഗം തന്നെ റെഡിയായി. സമയം രണ്ടര കഴിഞ്ഞിരുന്നു. ലോഡ്ജിനോട് ചേര്‍ന്ന് തന്നെ ഒരു വെജിറ്റേറിയന്‍ ഹോട്ടലുണ്ട്, അവിടെ നിന്ന് ഭക്ഷണം കഴിച്ചു. ബസ്സിനുള്ള വഴിയും ചോദിച്ച് മനസ്സിലാക്കി. പഴയ സ്റ്റാന്‍ഡില്‍ നിന്ന് അവിടേയ്ക്ക് ബസ്സില്ല. അവിടുന്ന് പുതിയ സ്റ്റാന്‍ഡിലേയ്ക്ക് എപ്പോഴും ലോ ഫ്ളോര്‍ ബസ്സുണ്ട്. അവിടെ നിന്ന് ചെന്നരായപട്ടണം ചെന്നിട്ട് വേറെ ബസ്സിന് വേണം പോകാന്‍. ചെന്നരായപട്ടണം ഹാസ്സന്‍ - ബാംഗ്ളൂര്‍ റൂട്ടിലാണ്. അതുകൊണ്ട് എപ്പോഴും ബസ്സുണ്ടാകും. നല്ല വഴിയാണ്. അവിടെ ഒരു ചെറിയ സ്റ്റാന്ഡ് ഉണ്ട്. അതിലാണ് ഇറങ്ങേണ്ടത്. അവിടുന്ന് ശ്രാവണബലഗോളയ്ക്ക് ബസ്സ് കിട്ടും. തനി ഒരു നാട്ടിന്‍പുറത്തപകൂടെയുള്ള യാത്ര. തെങ്ങിന്‍ തോപ്പുകളാണ് വശങ്ങളില്‍ അധികം. ഓലകളുടെ നീണ്ട കെട്ടുകള്‍ മിക്കയിടത്തും ചാരി വച്ചിട്ടുള്ളത് കാണാം. കേരളത്തില്‍ ഇത്തരമൊരു കാഴ്ച എന്നേ നഷ്ടമായി. തെങ്ങുണ്ടായിട്ട് വേണ്ടേ ഓല ! ബസ്സില്‍ ജോലി കഴിഞ്ഞ് തിരികെ പോകുന്നവരും വിദ്യാര്‍ത്ഥികളും പിന്നെ നാട്ടുകാരും ആണ് പ്രധാനം, പിന്നെ കേരളത്തിലെ പോലെ കുറച്ച് ഹിന്ദിക്കാരും (മറാത്തി, ബംഗാളി എല്ലാം നമുക്കിപ്പോ ഹിന്ദിക്കാര്‍ തന്നെ !). ബസ്സിറങ്ങേണ്ട സ്ഥലത്തിന് കുറച്ച് മുന്‍പായിത്തന്നെ മലമുകളിലെ ക്ഷേത്രം കാണാം. ബസ്സിറങ്ങി അല്പം നടന്നാല്‍ അടുത്ത് തന്നെ വലതു ഭാഗത്ത് ഒരു നടപ്പാത കാണാം.
ശ്രാവണബലഗോള ഗ്രാമത്തിന്‍റെ കേന്ദ്രത്തിലുള്ള കുളത്തിനു വശത്തൂടെയാണ് ഈ പാത. ചിത്രത്തില്‍ ഇടതുവശം കാണുന്ന മതില്‍ കുളത്തിന്‍റേതാണ്. ശ്രാവണബലഗോളയിലെ 'ബല ഗോള' (വെളുത്ത കുളം) ആണത്രെ ഇത്. നടപ്പാത കടന്ന് ചെല്ലുന്നത് ഒരു റോഡിലേയ്ക്കാണ്. ഇടത്തോട്ട് നടക്കുമ്പോള്‍ കുളം കാണാം.
(ഈ ജലാശയത്തിന്‌റെ വിശാലമായ ചിത്രം നമുക്ക് മലകയറുമ്പോ കാണാം.) ഇതിനു പുറകില്‍ കാണുന്ന മലയാണ് ചന്ദ്രഗിരി. ഇതും വിന്ധ്യഗിരിയുമാണ് ഇവിടെ പ്രധാനം. കുളത്തിന്‍റെ അറ്റം എത്തുമ്പോള്‍ വിന്ധ്യഗിരിയിലേയ്ക്കുള്ള കവാടം കാണാം. മഴ പതുക്കെ പൊടിയുന്നുണ്ട്. മടിയോടെ കാമറ പുറത്തെടുത്ത് പണി തുടങ്ങി. (മുകളിലെ രണ്ട് ചിത്രങ്ങളും സഹയാത്രികന്‍ വക.) ആദ്യം വിന്ധ്യഗിരിയുടെ മുകളിലേയ്ക്ക് തുടങ്ങുന്ന കല്പടവുകളിലേയ്ക്ക് നമ്മെ ക്ഷണിക്കുന്ന കവാടം...

കവാടം കടന്നാല്‍ വലതുഭാഗത്തായി ചെരുപ്പുകള്‍ സൂക്ഷിക്കുന്ന സ്ഥലത്ത് അവ ഏല്‍പ്പിക്കണം. പിന്നെ നഗ്നപാദനായി ദാ... ആ കാണുന്ന മലമുകളിലേയ്ക്ക്. വിവിധ പ്രായത്തില്‍ നിരവധിപേര്‍ കയറുകയും ഇറങ്ങുകയും ചെയ്യുന്നു. കുട്ടികള്‍ നല്ല മൂഡിലാണ്. അവര്‍ ഓടിച്ചാടി കയറുന്നു.


കുറച്ച് കയറിക്കഴിഞ്ഞപ്പോള്‍ പുറകിലേയ്ക്ക് നോക്കി. കുളവും അതിനപ്പുറം മലയും മറ്റുമായി മനോഹരമായ കാഴ്ച. കുറച്ച് പടവുകള്‍ കൂടെ കയറിക്കഴിഞ്ഞപ്പോള്‍ വീണ്ടും നിന്നു, പുറകിലേയ്ക്ക് നോക്കി... അപ്പോഴാണ് മനസ്സിലായത് കാഴ്ചയുടെ ഭംഗി മാത്രമല്ല നിര്‍ത്തുന്നത്. നല്ല കുത്തനെയാണ് നടകള്‍. അതുകൊണ്ട് മിക്കയാളുകളും ഇടയ്ക്കിടെ 'പ്രകൃതിഭംഗി ആസ്വദിക്കുന്നു'!
അങ്ങനെ കുത്തനെയുള്ള ആ പടവുകള്‍ കയറി മുകളിലെത്തി. ആദ്യം കാണുന്നസ്ഥലമാണ് അടുത്ത ചിത്രത്തിലുള്ലത്. അതിനരികിലായി പാറയില്‍ ചില എഴുത്തുകള്‍ ഉണ്ട്. അതിന് കേടുപാടുകള്‍ പറ്റാതിരിക്കാന്‍ ചില്ലിട്ട് സംരക്ഷിച്ചിരിക്കുന്നു.



വീണ്ടും അവിടെ നിന്നും കയറ്റം തന്നെ. സന്ധ്യ ആയിത്തുടങ്ങിയിരുന്നു. അതു കൊണ്ട് ധാരാളം പേര്‍ തിരികെ ഇറങ്ങി വരുന്നുണ്ട്.

ദാ, നമ്മള്‍ തേടിയ ആള്‍ അങ്ങനെ തലയുയര്‍ത്തി നില്‍ക്കുന്നു. മതില്‍ക്കെട്ടിനെക്കാള്‍ പൊക്കത്തില്‍ നില്‍ക്കുന്ന ഈ സ്വാമിയെ കര്‍ണ്ണാടകത്തില്‍ മറ്റ് പല സ്ഥലങ്ങളിലും കാണാം. ബാഹുബലി ബേട്ട ഒരു ഉദാഹരണം. എന്നാല്‍ ഏറ്റവും ഉയരവും പ്രൌഡിയും ഈ പ്രതിമയ്ക്ക് മാത്രം അവകാശമത്രെ.
പ്രതിമ നില്ക്കുന്ന കെട്ടിടത്തിന്‍റെ മുന്‍ഭാഗം ആണ് താഴെയുള്ള ചിത്രത്തില്‍.
അകത്ത് കടന്നാല്‍ കുറെ തുണുകളൊക്കെയുള്ള ഒന്നാണ് ഇത്. അതിന്റെ നടുമുറ്റത്താണ് കക്ഷി അങ്ങനെ തലയുയര്‍ത്തി നിക്കണത്.
പടമെടുക്കാന്‍ ശരിയ്ക്ക് താഴെ നിന്ന് തന്നെ കാമറ വയ്ക്കേണ്ടി വരും. എന്നാലെ മൊത്തത്തില്‍ ഫെയ്മിലൊതുങ്ങൂ.
കാല്‍പാദം ആണ് അടുത്തചിത്രത്തില്‍. മുന്‍പില്‍ നില്ക്കുന്ന പൂജാരി മാത്രമാണ് അകത്തെ അരമതിലിനകത്ത് ഉള്ളത്. കക്ഷി എന്തോ പ്രസാദം നല്കുന്നുണ്ടെന്ന് തോന്നുന്നു. ഞങ്ങള്‍ രണ്ടാളും പ്രതിമയുടെ ആകാരവും പരിസരവും വീക്ഷിച്ചു. വിദേശികളടക്കം ധാരാളം ആളുകള്‍ ഇവിടെ വന്ന് പോയിക്കൊണ്ടിരിക്കുന്നു.
അകത്തുകൂടെ ഒരു അറ പോലെ ചുറ്റും ഉണ്ട്. അതിലൂടെ ചുറ്റിയപ്പോള്‍ കണ്ട പ്രതിമകളാണ് അടുത്ത ചിത്രത്തില്‍. ഒരു ഭാഗത്ത് വെളിച്ചം ഉണ്ടായിരുന്നു. പ്രതിമയുടെ പുറകില്‍ വരുന്ന ഭാഗം ഇരുട്ടാണ്. ഈ പ്രതിമകള്‍ മാത്രേ അവിടെ കാണാനുള്ളൂ.
പുറത്തിറങ്ങി നോക്കുമ്പോള്‍ കാണുന്ന മനോഹരമായ കാഴ്ച...
ശബരിമലയിലും മറ്റും ഉള്ളതു പോലെ ആളെ ഇരുത്തി ഇവിടെ എത്തിക്കുന്ന സംവിധാനം ഇവിടെയും ഉണ്ട്. അകത്ത് പോയ ആള്‍ തിരികെ വരാനായി വണ്ടിക്കാരന്‍റെ കാത്തിരിപ്പ്...
ഇറങ്ങുന്ന വഴിയാണ് ചുമരുകളും തൂണുകളുമെല്ലാം ശരിക്ക് ശ്രദ്ധിക്കുന്നത്...



സൂര്യാസ്തമയം ആയി...

അങ്ങനെ ഗോമതേശ്വരനെ കണ്ട് താഴെ എത്തി. ബസ്സ് തയ്യാറായിരുന്നു. നേരെ ഹാസ്സന്‍. വന്ന വഴി തിരികെ രാത്രിയായി... നാളെ ബേലൂര്‍, ഹാളീബീ‍ഡു. രണ്ടും എഴുതാം.

Comments

  1. കൊള്ളാം മാഷെ..അസ്സലായിരിക്കുന്നൂ...!

    ReplyDelete
  2. ആത്മന്‍, ഗോമതേശ്വരനെ കാണിച്ചു തന്നതിന് വളരെ നന്ദി ട്ടോ.... ചിത്രങ്ങളും വിവരണവും അസ്സലായി...

    ReplyDelete
  3. എനിക്കും ഇഷ്ടമായി ചിത്രങ്ങളും വിവരണവും ഒക്കെ..
    നന്ദി!

    ReplyDelete
  4. കുറെ നാളുകള്‍ക്കു ശേഷമാണ് ഒരു പോസ്റ്റ് തയ്യാറാക്കിയത്. അതിന് നല്‍കിയ അഭിനന്ദനങ്ങള്‍ക്ക് മുരളീമുകുന്ദന്‍, കുഞ്ഞൂസ്, ദ മാന്‍..., ആത്മ എല്ലാരോടും സന്തോഷം അറിയിക്കുന്നു.

    ReplyDelete
  5. നല്ല ചിത്രങ്ങള്‍,വിവരണവും..

    ReplyDelete
  6. നല്ല ചിത്രങ്ങളും വിവരണവും...

    ReplyDelete
  7. കൃഷ്ണകുമാര്‍, അലി,
    സന്ദര്‍ശനത്തില്‍ സന്തോഷം...

    ReplyDelete
  8. വിവരണങ്ങളും ചിത്രങ്ങളും നന്നായിട്ടുണ്ട്

    ReplyDelete
  9. ചിത്രങ്ങളും വിവരണവും ഒക്കെ എനിക്കും ഇഷ്ടമായി

    ReplyDelete
  10. ആത്മന്‍ -കാണാതെ സ്ഥലം ഇങനെ ഒക്കെ കാണാം .
    ഈ യാത്രക്കും കൂടെ കൂടി .നന്ദി .എന്നാലും ആ ബസ്സില്‍ കയറിയപ്പോള്‍ തുടങ്ങി ഞാനും ഒരു ഓട്ടത്തില്‍ ആണ് പോസ്റ്റ്‌ വായിച്ചു തീര്‍ത്തത് ..വളരെ സ്പീഡില്‍ ഗോമതേശ്വരനെ കാണാന്‍ പോയത് എന്ന് തോന്നിട്ടോ ..

    ReplyDelete
  11. ശ്രീ, അരീക്കോടന്‍,
    സന്തോഷം...
    സിയ,
    ഞാന്‍ വിസ്തരിച്ചെഴുതിയില്ല എന്ന പരാതി തിരിച്ചറിയുന്നു.
    എന്നാല്‍ ഈ യാത്ര അല്പം വേഗത്തില്‍ തന്നെ ആയിരുന്നു.
    അഭിപ്രായം എഴുതിയതില്‍ സന്തോഷം.

    ReplyDelete
  12. നല്ല ചിത്രങ്ങൾ. വിവരണം ഒരൽപ്പൻ ധൃതികൂട്ടിപ്പറഞ്ഞപോലെ....
    എവിടെ യാത്രയുടെ ബാക്കി?

    ReplyDelete

Post a Comment

Popular posts from this blog

സുന്ദരപാണ്ഡ്യപുരം