Saturday, October 11, 2014

വിലങ്ങന്‍ കുന്ന്

പുതിയ പോസ്റ്റ് വിലങ്ങന്‍ കുന്നാണ്. (നിറം ഇത്രയും പ്രതീക്ഷിക്കരുതെന്ന് മുന്നറിയിപ്പ്) തൃശൂര്‍ - കുന്നംകുളം റോഡില്‍ അമല ആശുപത്രിയ്ക്ക് തൊട്ടു മുന്‍പ് ഇടത്തോട്ട് ഉളള വഴിയാണ് വിലങ്ങന്‍ കുന്നിലേയ്ക്ക്. മുന്‍പ് കൂട്ടുകാര്‍ പറഞ്ഞും ബ്ലോഗെഴുത്തുകളില്‍ നിന്നും ഈ സ്ഥലത്തെക്കുറിച്ച് കേട്ടിട്ടുണ്ടെങ്കിലും കഴിഞ്ഞ ദിവസമാണ് പോയത്. എത്രയോ തവണ ഇതിന് മുന്നിലൂടെ യാത്ര ചെയ്തിരിക്കുന്നു. എന്നാല്‍ ഈ വഴി തിരിഞ്ഞില്ല. ഓരോന്നിനും അതിന്‍റേതായ സമയമുണ്ട്.... അല്ലേ...

പ്രധാന റോഡില്‍ നിന്ന് രണ്ടര കിലോമീറ്റര്‍ മാത്രമേ ദൂരമുള്ളൂ. വഴിയില്‍ ടിക്കറ്റ് കൌണ്ടര്‍ ഉണ്ട്. ആളുകള്‍ക്ക്, വാഹനത്തിന്, ക്യാമറയ്ക്ക്... നല്ല വഴിയാണ്. മുളങ്കൂട്ടങ്ങള്‍ നിറഞ്ഞ തണലുള്ള വഴി. ഞങ്ങള്‍ പോകുന്ന സമയം നല്ല ഉച്ചസമയമാണ്. അതു വഴി വന്നപ്പോള്‍ പെട്ടന്ന് തിരിഞ്ഞതാണ്. വൈകീട്ടാണ് നല്ല സമയം.

മുകളിലെത്തും മുന്‍പ് കണ്ട ഒരു ദൃശ്യം...

വാഹനം പാര്‍ക്ക് ചെയ്ത് നേരെ കണ്ട ശില്പം ആണ് അടുത്ത ചിത്രം. ഒരു കേരള കര്‍ഷക കുടംബം. കോണ്‍ക്രീറ്റില്‍ ചെയ്ത ഈ ശില്പം ബംഗാളില്‍ കണ്ട രാം കിങ്കറിന്‍റെ സാന്താള്‍ കുടുംബം എന്ന ശില്പത്തെ ഓര്‍മ്മിപ്പിച്ചു. ലളിതവും മികച്ചതുമായ ശില്പം.

അവിടുന്ന് മുന്നോട്ട് നടന്നു. ഇവിടുത്തെ ഭൂമിശാസ്ത്രം ഒന്നും അറിയില്ല. എന്നാല്‍ ചുറ്റും ഒരു നടപ്പാത ഉണ്ടെന്ന് പിന്നെ മനസ്സിലായി. താഴെ ദൂരെയായി തൃശൂരിലെ പാടങ്ങളാണ് കാണുന്നത് മുകളില്‍ കണ്ട ശില്പവും പണിയാതെ കിടക്കുന്ന പാടങ്ങളും പുതിയ കാലത്തിന്‍റെ വിരോതാഭാസം...

ഈ കുന്നിന്‍ മുകളില്‍ എങ്ങോട്ട് തിരിഞ്ഞാലും നല്ല ദൃശ്യങ്ങള്‍ തന്നെയാണ് നമുക്ക് കാണാനാവുക. വെയിലിന്‍റെ കാഠിന്യമൊന്നും ഒന്നര വയസ്സുകാരന്‍ വിദ്യാര്‍ത്ഥിയ്ക്ക് ബാധകമായിരുന്നില്ല. കൈ വിട്ടാല്‍ കക്ഷി ഓട്ടമായിരുന്നു.

ഇവിടുത്തെ മറ്റൊരു പ്രധാന കാഴ്ച ശലഭങ്ങളാണ്. തനി നാടന്‍ ചെടികളില്‍ നിറയെ ചിത്രശലഭങ്ങളെ കാണാം. വിശാലമായ കാഴ്ചകള്‍ക്കിടയില്‍ ചില ചെറു നോട്ടങ്ങള്‍ ഇത്തരം മനോഹരദൃശ്യങ്ങള്‍ നമുക്ക് തരും.

മുന്‍പ് പറഞ്ഞ നടപ്പാതയാണ് അടുത്ത ചിത്രത്തില്‍. നാട്ടുകല്ലുകളുപയോഗിച്ച് നിര്‍മ്മിച്ച വഴിയ്ക്ക് അല്പം കൂടെ വീതിയാകാമായിരുന്നു. ഇത് ഒരാള്‍ക്ക് നടക്കാനേ പറ്റൂ.

ഈ സ്ഥലം തൃശ്ശൂരിലെ പ്രധാന കല്യാണ ആല്‍ബം ലൊക്കേഷനാണെന്ന് ഒരു ബ്ലോഗില്‍ വായിച്ചിരുന്നു. ഭാവിയില്‍ ഈ ലൊക്കേഷന്‍ എങ്ങനെ ഉപയോഗിക്കണമെന്ന് ചര്‍ച്ച ചെയ്യുന്നവരായിരുന്നു അവിടെ അധികമെന്ന് തോന്നുന്നു. ഇടയ്ക്കിടെ വെയിലിന് മറയേകാന്‍ ചെറിയ കൂടാരങ്ങളും സിമന്‍റ് ബെഞ്ചുകളുമുണ്ട്. അവിടെയെല്ലാം നേരത്തെ ബുക്കിങ്ങായി...



നടന്ന് ഒരു റൌണ്ട് കഴിഞ്ഞു. അപ്പോഴാണ് പീരങ്കി കണ്ടത്. എടുത്തു ഒന്ന്,

അടുത്തായി ഉയരത്തില്‍ കയറി തൃശ്ശൂരിനെ കാണാനായി ഇരുമ്പ് നിര്‍മ്മിതമായ ഒരു തട്ട് ഉണ്ട്. പടികള്‍ കടന്ന് മുകളിലെത്തിയാല്‍ അവിടെ ഇരിയ്ക്കാന്‍ രണ്ടു മൂന്ന് ബെഞ്ചുകള്‍ ഉണ്ട്. അവിടെ നിന്നെടുത്തതാണ് അടുത്ത ചിത്രം. ശോഭാ സിറ്റിയാണ് ദൂരെ കാണുന്നത്. ആദ്യം നമ്മള്‍ കണ്ട ചിത്രത്തിലെ കുടുംബം ഇവിടെ മറ്റൊരു ചിന്തയാകുന്നു...

അവിടെ കുട്ടികള്‍ക്കായുള്ള ചെറിയ ഒരു പാര്‍ക്കുണ്ട്. ഉഞ്ഞാലും സീസോയും മറ്റും അവിടെ കുട്ടികള്‍ക്കായി ഒരുക്കിയിട്ടുണ്ട്.

കുറച്ച് നേരം ഊഞ്ഞാലാട്ടം. വീണ്ടും വണ്ടി കിടക്കുന്നിടത്തേയ്ക്ക്. ഇടയ്ക്ക് ചെറിയൊരു ഐസ്ക്രീം പാര്‍ലര്‍ സന്ദര്‍ശനം.

തിരികെ... ആദ്യം കണ്ട സ്ഥലത്ത് വണ്ടി നിര്‍ത്തി ഒരു ഫോട്ടോ. ഇത്തരം യാത്രകള്‍ക്കായുള്ള പുതിയ ചങ്ങാതി...



Friday, October 10, 2014

കുടക്കല്ലുകളും വെട്ടുകല്‍ ഗുഹയും

ബ്ലോഗ് വീണ്ടും സജീവമാക്കാനുള്ള ശ്രമം. കുറെ നാള്‍ ഡ്രാഫ്റ്റില്‍ കിടന്നു ഇത്...

നൂറ്റാണ്ടുകള്‍ക്കു മുന്‍പുള്ള ചരിത്രസ്മാരകങ്ങള്‍ യാദൃശ്ചികമായി കാണാനിടയായ അനുഭവമാണ് ഈ പോസ്റ്റ്. തൃശ്ശൂര്‍ ജില്ലയില്‍ അരിയന്നൂര്‍ എന്ന സ്ഥലത്താണ് കുടക്കല്ലുകള്‍ സ്ഥിതി ചെയ്യുന്നത്. മലയാളം വിക്കിയില്‍ കുടക്കല്ലിനെക്കുറിച്ച് നോക്കിയപ്പോള്‍ കുന്നംകുളത്തിനടുത്തുള്ള ചിറമനങ്ങാട് എന്ന സ്ഥലത്തെക്കുറിച്ചുള്ള വിവരം മാത്രമേ ഉള്ളൂ. ഇത്തരം സ്മാരകങ്ങളെക്കുറിച്ചുള്ള നമ്മുടെ അറിവു് വളരെ പരിമിതമാണെന്ന് പറയാം. മറയൂരില്‍ ആണ് മുന്‍പ് ഞാന്‍ മുനിയറകളും മറ്റും കണ്ടിട്ടുള്ളത്.

കേന്ദ്രപുരാവസ്തു വകുപ്പ് നല്ലനിലയില്‍ സംരക്ഷിച്ചിട്ടുള്ള ഈ സ്ഥലങ്ങള്‍, ഇതുവഴി വരാന്‍ കഴിയുന്നവര്‍ ശ്രദ്ധിക്കുന്നതിനായി ഈ കുറിപ്പ് ...

തൃശൂര്‍ നിന്ന് ചൊവ്വല്ലൂര്‍പ്പടി വഴി ഗുരുവായൂര്‍ക്ക് പോകുന്ന ബസ്സില്‍ കൂനമൂച്ചി സെന്‍റര്‍ എന്ന സ്റ്റോപ്പില്‍ നിന്ന് ഇടത്തോട്ടാണ് ഇവിടേയ്ക്കുള്ള വഴി. ശ്രീകൃഷ്ണ കോളേജിലേയ്ക്കുള്ള വഴിയ്ക്ക് ശേഷം വലത്തോട്ടുള്ള വഴിയ്ക്ക് കുറച്ച് ചെന്നാല്‍ സ്ഥലമായി. ഒരു സാധാരണ ഗ്രാമാന്തരീക്ഷം. അടുത്തടുത്തായി വീടുകളുള്ള ഇത്തരമൊരു സ്ഥലത്ത് ഇങ്ങനെയൊന്ന് പ്രതീക്ഷിക്കാന്‍ കഴിഞ്ഞിരുന്നില്ല. 

വെട്ടുകല്ലില്‍ നിര്‍മ്മിച്ച ഫ്രെയ്മില്‍ ഈ സ്ഥലത്തെക്കുറിച്ചുള്ള വിവരണം നല്കിയിരിക്കുന്നത് നന്നായിട്ടുണ്ട്.

ഇരുമ്പ്  വലയാല്‍ നിര്‍മ്മിച്ച ചുറ്റുമതിലിനകത്ത് നല്ല രീതിയില്‍ സംരക്ഷിച്ചിരുക്കുന്നു ഇവിടം. നടുവിലായി വലിയൊരു പാലമരമുണ്ട്. അതിന് ചുറ്റിലുമായി കുടക്കല്ലുകളും.

കുടക്കല്ലുകള്‍ മിക്കതും നല്ല രീതിയില്‍ തന്നെ നിലനില്‍ക്കുന്നു. രണ്ടെണ്ണം മാത്രമാണ് തകര്‍ന്ന നിലയില്‍ ഉള്ളത്. സംരക്ഷിയ്ക്കപ്പെടും മുന്‍പ് നമ്മുടെ നാട്ടുകാരുടെ വിക്രിയകളാകും ഇത്.


നല്ല ആകൃതിയും വലിപ്പവുമുള്ള ഈ ശിലകള്‍ക്ക് നൂറ്റാണ്ടുകള്‍ക്ക് മുന്‍പുള്ള എത്രയോ ജീവിതങ്ങളുമായി ബന്ധമുണ്ടാകും... അധ്വാനത്തിന്‍റെയും വിശ്വാസത്തിന്‍റെയുമെല്ലാം മേളനം ഇവിടെ നടന്നു.


തകര്‍ന്ന കുടക്കല്ലിലൊന്ന്. അടിയിലെ കല്ലുകളുടെ ഘടന ഇതില്‍ നിന്ന് മനസ്സിലാക്കാം.

ഇവിടെ നിന്ന് അടുത്ത് തന്നെയാണ് വെട്ടുകല്‍ ഗുഹ സ്ഥിതി ചെയ്യുന്നത്.(പ്രശസ്ത സാഹിത്യകാരന്‍ ശ്രീ. കോവിലന്‍റെ വീട് ഇതിനരികിലാണ്) തപസ്സിനും ധ്യാനത്തിനും മറ്റുമായി നിര്‍മ്മിച്ചതാകും ഇത്. അടുത്തടുത്ത സ്ഥലങ്ങളിലായി കാണുന്ന ഈ രണ്ട് സ്മാരകങ്ങളുമായി ബന്ധമുണ്ടാകുമെന്ന് തീര്‍ച്ചയാണല്ലോ. താഴെ കാണുന്ന ചിത്രത്തിലെ ചതുരത്തിലുള്ള ഭാഗം ആണ്'പ്രവേശനകവാടം'. അതിനകത്ത് ഇറങ്ങി തൊട്ടടുത്ത് കാണുന്ന വൃത്തത്തിലുള്ള ദ്വാരത്തിന്‍റെ കീഴെ ഉള്ള അറയിലേയ്ക്ക് പ്രവേശിക്കാം.


ഇറങ്ങാനുള്ള വഴി...

അറയിലേയ്ക്ക് കടക്കാന്‍ ചെറിയ ഒരു ദ്വാരമാണുള്ളത്.

അകത്തു നിന്ന് മേല്പോട്ട് നോക്കിയാല്‍...

ഗോളാകൃതിയില്‍ അകം കൊത്തിക്കളഞ്ഞാണ് അറയുടെ നിര്‍മ്മാണം. ഗുഹാ ക്ഷേത്രങ്ങളുടെ മാതൃയാണ് ഇത്.

ഇരിക്കുന്നതിനായി മൂന്ന് ഇരിപ്പിടങ്ങള്‍ കല്ല് കൊത്തി മാറ്റി നിര്‍മ്മിച്ചിട്ടുണ്ട്.





ആവശ്യത്തിന് വായുവും വെളിച്ചവും അകത്ത് കിട്ടും. നല്ല വെയിലുള്ളപ്പോഴും തണുപ്പാണ് ഇവിടെ. കല്ലില്‍ പൂപ്പല്‍ പിടിച്ച് കാണുന്നത് ഈ തണവ് കോണ്ടാണ്.

വെട്ടുകല്‍ ഗുഹയെക്കുറിച്ച് അവിടെ സ്ഥാപിച്ചിരിക്കുന്ന വിവരണം,

Friday, May 20, 2011

ശ്രാവണബലഗോള

ഒരു ചെറിയ ഇടവേളക്ക് ശേഷം വീണ്ടും ഒരു യാത്ര. ബേലൂരും ഹാളീബീഡും ശ്രാവണബലഗോളയും ലക്ഷ്യം. മംഗലാപുരം വരെ ട്രെയിനിലെത്തി അവിടുന്ന് ഹാസ്സന്‍. സ്വന്തം വാഹനത്തിലാണെങ്കില്‍ മംഗലാപുരത്തിന് പോകേണ്ടതില്ല. മംഗലാപുരം - ഹാസ്സന്‍ നാല് മണിക്കൂറിലധികം എടുക്കുന്ന യാത്രയാണ്. ദൂരം നോക്കിയിട്ട് കാര്യമില്ല, മല ചുറ്റിയുള്ള വഴിയാണ്. കുറെ സമയം കാട് തന്നെ. ഹാസ്സനില്‍ പുതിയ ബസ്സ് സ്റ്റാന്‍റില്‍ എത്തി ഒരു ഓട്ടോ പിടിച്ച് നമുക്ക് പറ്റുന്ന ലോഡ്ജ് ഏര്‍പ്പാടാക്കി തരാന്‍ പറഞ്ഞു. ആദ്യം പോയ സ്ഥലത്ത് മുറി കിട്ടിയില്ലെങ്കിലും അടുത്ത സ്ഥലം ഓകെ. പഴയ സ്റ്റാന്‍ഡിനടുത്തായതിനാല്‍ യാത്രയ്ക്ക് സൌകര്യമായി. റൂം നന്ന്, റേറ്റും കുഴപ്പമില്ല (Rs.300). വേഗം തന്നെ റെഡിയായി. സമയം രണ്ടര കഴിഞ്ഞിരുന്നു. ലോഡ്ജിനോട് ചേര്‍ന്ന് തന്നെ ഒരു വെജിറ്റേറിയന്‍ ഹോട്ടലുണ്ട്, അവിടെ നിന്ന് ഭക്ഷണം കഴിച്ചു. ബസ്സിനുള്ള വഴിയും ചോദിച്ച് മനസ്സിലാക്കി. പഴയ സ്റ്റാന്‍ഡില്‍ നിന്ന് അവിടേയ്ക്ക് ബസ്സില്ല. അവിടുന്ന് പുതിയ സ്റ്റാന്‍ഡിലേയ്ക്ക് എപ്പോഴും ലോ ഫ്ളോര്‍ ബസ്സുണ്ട്. അവിടെ നിന്ന് ചെന്നരായപട്ടണം ചെന്നിട്ട് വേറെ ബസ്സിന് വേണം പോകാന്‍. ചെന്നരായപട്ടണം ഹാസ്സന്‍ - ബാംഗ്ളൂര്‍ റൂട്ടിലാണ്. അതുകൊണ്ട് എപ്പോഴും ബസ്സുണ്ടാകും. നല്ല വഴിയാണ്. അവിടെ ഒരു ചെറിയ സ്റ്റാന്ഡ് ഉണ്ട്. അതിലാണ് ഇറങ്ങേണ്ടത്. അവിടുന്ന് ശ്രാവണബലഗോളയ്ക്ക് ബസ്സ് കിട്ടും. തനി ഒരു നാട്ടിന്‍പുറത്തപകൂടെയുള്ള യാത്ര. തെങ്ങിന്‍ തോപ്പുകളാണ് വശങ്ങളില്‍ അധികം. ഓലകളുടെ നീണ്ട കെട്ടുകള്‍ മിക്കയിടത്തും ചാരി വച്ചിട്ടുള്ളത് കാണാം. കേരളത്തില്‍ ഇത്തരമൊരു കാഴ്ച എന്നേ നഷ്ടമായി. തെങ്ങുണ്ടായിട്ട് വേണ്ടേ ഓല ! ബസ്സില്‍ ജോലി കഴിഞ്ഞ് തിരികെ പോകുന്നവരും വിദ്യാര്‍ത്ഥികളും പിന്നെ നാട്ടുകാരും ആണ് പ്രധാനം, പിന്നെ കേരളത്തിലെ പോലെ കുറച്ച് ഹിന്ദിക്കാരും (മറാത്തി, ബംഗാളി എല്ലാം നമുക്കിപ്പോ ഹിന്ദിക്കാര്‍ തന്നെ !). ബസ്സിറങ്ങേണ്ട സ്ഥലത്തിന് കുറച്ച് മുന്‍പായിത്തന്നെ മലമുകളിലെ ക്ഷേത്രം കാണാം. ബസ്സിറങ്ങി അല്പം നടന്നാല്‍ അടുത്ത് തന്നെ വലതു ഭാഗത്ത് ഒരു നടപ്പാത കാണാം.
ശ്രാവണബലഗോള ഗ്രാമത്തിന്‍റെ കേന്ദ്രത്തിലുള്ള കുളത്തിനു വശത്തൂടെയാണ് ഈ പാത. ചിത്രത്തില്‍ ഇടതുവശം കാണുന്ന മതില്‍ കുളത്തിന്‍റേതാണ്. ശ്രാവണബലഗോളയിലെ 'ബല ഗോള' (വെളുത്ത കുളം) ആണത്രെ ഇത്. നടപ്പാത കടന്ന് ചെല്ലുന്നത് ഒരു റോഡിലേയ്ക്കാണ്. ഇടത്തോട്ട് നടക്കുമ്പോള്‍ കുളം കാണാം.
(ഈ ജലാശയത്തിന്‌റെ വിശാലമായ ചിത്രം നമുക്ക് മലകയറുമ്പോ കാണാം.) ഇതിനു പുറകില്‍ കാണുന്ന മലയാണ് ചന്ദ്രഗിരി. ഇതും വിന്ധ്യഗിരിയുമാണ് ഇവിടെ പ്രധാനം. കുളത്തിന്‍റെ അറ്റം എത്തുമ്പോള്‍ വിന്ധ്യഗിരിയിലേയ്ക്കുള്ള കവാടം കാണാം. മഴ പതുക്കെ പൊടിയുന്നുണ്ട്. മടിയോടെ കാമറ പുറത്തെടുത്ത് പണി തുടങ്ങി. (മുകളിലെ രണ്ട് ചിത്രങ്ങളും സഹയാത്രികന്‍ വക.) ആദ്യം വിന്ധ്യഗിരിയുടെ മുകളിലേയ്ക്ക് തുടങ്ങുന്ന കല്പടവുകളിലേയ്ക്ക് നമ്മെ ക്ഷണിക്കുന്ന കവാടം...

കവാടം കടന്നാല്‍ വലതുഭാഗത്തായി ചെരുപ്പുകള്‍ സൂക്ഷിക്കുന്ന സ്ഥലത്ത് അവ ഏല്‍പ്പിക്കണം. പിന്നെ നഗ്നപാദനായി ദാ... ആ കാണുന്ന മലമുകളിലേയ്ക്ക്. വിവിധ പ്രായത്തില്‍ നിരവധിപേര്‍ കയറുകയും ഇറങ്ങുകയും ചെയ്യുന്നു. കുട്ടികള്‍ നല്ല മൂഡിലാണ്. അവര്‍ ഓടിച്ചാടി കയറുന്നു.


കുറച്ച് കയറിക്കഴിഞ്ഞപ്പോള്‍ പുറകിലേയ്ക്ക് നോക്കി. കുളവും അതിനപ്പുറം മലയും മറ്റുമായി മനോഹരമായ കാഴ്ച. കുറച്ച് പടവുകള്‍ കൂടെ കയറിക്കഴിഞ്ഞപ്പോള്‍ വീണ്ടും നിന്നു, പുറകിലേയ്ക്ക് നോക്കി... അപ്പോഴാണ് മനസ്സിലായത് കാഴ്ചയുടെ ഭംഗി മാത്രമല്ല നിര്‍ത്തുന്നത്. നല്ല കുത്തനെയാണ് നടകള്‍. അതുകൊണ്ട് മിക്കയാളുകളും ഇടയ്ക്കിടെ 'പ്രകൃതിഭംഗി ആസ്വദിക്കുന്നു'!
അങ്ങനെ കുത്തനെയുള്ള ആ പടവുകള്‍ കയറി മുകളിലെത്തി. ആദ്യം കാണുന്നസ്ഥലമാണ് അടുത്ത ചിത്രത്തിലുള്ലത്. അതിനരികിലായി പാറയില്‍ ചില എഴുത്തുകള്‍ ഉണ്ട്. അതിന് കേടുപാടുകള്‍ പറ്റാതിരിക്കാന്‍ ചില്ലിട്ട് സംരക്ഷിച്ചിരിക്കുന്നു.



വീണ്ടും അവിടെ നിന്നും കയറ്റം തന്നെ. സന്ധ്യ ആയിത്തുടങ്ങിയിരുന്നു. അതു കൊണ്ട് ധാരാളം പേര്‍ തിരികെ ഇറങ്ങി വരുന്നുണ്ട്.

ദാ, നമ്മള്‍ തേടിയ ആള്‍ അങ്ങനെ തലയുയര്‍ത്തി നില്‍ക്കുന്നു. മതില്‍ക്കെട്ടിനെക്കാള്‍ പൊക്കത്തില്‍ നില്‍ക്കുന്ന ഈ സ്വാമിയെ കര്‍ണ്ണാടകത്തില്‍ മറ്റ് പല സ്ഥലങ്ങളിലും കാണാം. ബാഹുബലി ബേട്ട ഒരു ഉദാഹരണം. എന്നാല്‍ ഏറ്റവും ഉയരവും പ്രൌഡിയും ഈ പ്രതിമയ്ക്ക് മാത്രം അവകാശമത്രെ.
പ്രതിമ നില്ക്കുന്ന കെട്ടിടത്തിന്‍റെ മുന്‍ഭാഗം ആണ് താഴെയുള്ള ചിത്രത്തില്‍.
അകത്ത് കടന്നാല്‍ കുറെ തുണുകളൊക്കെയുള്ള ഒന്നാണ് ഇത്. അതിന്റെ നടുമുറ്റത്താണ് കക്ഷി അങ്ങനെ തലയുയര്‍ത്തി നിക്കണത്.
പടമെടുക്കാന്‍ ശരിയ്ക്ക് താഴെ നിന്ന് തന്നെ കാമറ വയ്ക്കേണ്ടി വരും. എന്നാലെ മൊത്തത്തില്‍ ഫെയ്മിലൊതുങ്ങൂ.
കാല്‍പാദം ആണ് അടുത്തചിത്രത്തില്‍. മുന്‍പില്‍ നില്ക്കുന്ന പൂജാരി മാത്രമാണ് അകത്തെ അരമതിലിനകത്ത് ഉള്ളത്. കക്ഷി എന്തോ പ്രസാദം നല്കുന്നുണ്ടെന്ന് തോന്നുന്നു. ഞങ്ങള്‍ രണ്ടാളും പ്രതിമയുടെ ആകാരവും പരിസരവും വീക്ഷിച്ചു. വിദേശികളടക്കം ധാരാളം ആളുകള്‍ ഇവിടെ വന്ന് പോയിക്കൊണ്ടിരിക്കുന്നു.
അകത്തുകൂടെ ഒരു അറ പോലെ ചുറ്റും ഉണ്ട്. അതിലൂടെ ചുറ്റിയപ്പോള്‍ കണ്ട പ്രതിമകളാണ് അടുത്ത ചിത്രത്തില്‍. ഒരു ഭാഗത്ത് വെളിച്ചം ഉണ്ടായിരുന്നു. പ്രതിമയുടെ പുറകില്‍ വരുന്ന ഭാഗം ഇരുട്ടാണ്. ഈ പ്രതിമകള്‍ മാത്രേ അവിടെ കാണാനുള്ളൂ.
പുറത്തിറങ്ങി നോക്കുമ്പോള്‍ കാണുന്ന മനോഹരമായ കാഴ്ച...
ശബരിമലയിലും മറ്റും ഉള്ളതു പോലെ ആളെ ഇരുത്തി ഇവിടെ എത്തിക്കുന്ന സംവിധാനം ഇവിടെയും ഉണ്ട്. അകത്ത് പോയ ആള്‍ തിരികെ വരാനായി വണ്ടിക്കാരന്‍റെ കാത്തിരിപ്പ്...
ഇറങ്ങുന്ന വഴിയാണ് ചുമരുകളും തൂണുകളുമെല്ലാം ശരിക്ക് ശ്രദ്ധിക്കുന്നത്...



സൂര്യാസ്തമയം ആയി...

അങ്ങനെ ഗോമതേശ്വരനെ കണ്ട് താഴെ എത്തി. ബസ്സ് തയ്യാറായിരുന്നു. നേരെ ഹാസ്സന്‍. വന്ന വഴി തിരികെ രാത്രിയായി... നാളെ ബേലൂര്‍, ഹാളീബീ‍ഡു. രണ്ടും എഴുതാം.